之前介紹過坐月的重要，今次就為大家介紹幾個有關坐月的注意事項：
1. 坐月應該坐幾耐？
其實視乎風俗習慣同身體狀況，一般會由三十日、四十日、兩個月到一百日不等，而老人輩的人更認為一百日先係最足夠的坐月時間，等媽媽身體有最適合的調理。
2. 坐月係咪真係一個月唔可以洗頭、沖涼？
坐月期間因為身體全身肌肉同骨骼關節呈現鬆脫同虛弱的狀況， 碰到水容易受寒，造成身體「入風」，令身體關節日後出現痛症，因此有坐月期間不宜洗頭沖涼的說法。然而現代環境較先進，若坐月期間真係要洗頭、沖涼，可選擇用煮過的熱薑水，並於沖洗後盡快抹乾身體、吹乾頭髮，穿適合的衣服保持身體和暖。
3. 咩時候先派薑醋？
按照傳統，一般會在「十二朝」即嬰兒出生後十二日先派薑醋，雖然明確原因不得而知，但相信係因為媽媽產後體力不足，初生嬰兒亦身體較虛弱的緣固，所以十二朝前不宜招待客人。另亦由於順產媽媽一般於十二朝開始可以食薑袪風進補，因此可於當日過後派薑醋給親朋分享喜悅。
4. 坐月點解唔可以蹲低？
因為產婦剛生完小朋友，子宮仲未回復原有大小，亦未回到原來位置。一旦蹲低，易令骨盤腔壓力上升，造成子宮下垂，並有機會引發日後尿失禁等問題，因此剛生產的婦女，還是應該乖乖遵守不能蹲這項啊。
5. 坐月點解唔可以拎重野？
懷孕期間，孕婦的骨盆腔結構會變得較鬆，生產完後，如經常拎重野，就有機會令韌帶的恢復力受損，造成身體不同的傷害。
其實，根據不同風俗習慣，各有唔同的傳統習俗。對產婦來說，最重要都係保持心情愉快、食適當的坐月食物、並儘量爭取多休息，自然能與孩子一齊渡過快樂的坐月時間。
講左咁多坐月時媽媽要注意的地方，咁坐月期間，爸爸有無野可以幫手呢？下次我們將會同大家講下坐月期間，爸爸的重要性。
