新年將至，與不同親朋好友相聚之餘，少不免會食各種不同的新年食品。而身為準媽媽，在飲食方面應留意下列幾項：
1. 切忌飲食過量或進食太過油膩食物
過年時間，好多時一大班朋友或家人喜歡到酒樓等餐廳食團年飯、開年飯等，不少新年應節如豬手、盆菜、油角等都較油膩，孕媽媽的消化能力普遍都較弱，因此只易淺嚐。如出外用餐，較宜選擇比較清淡的食物如清蒸魚、炒青菜等，避免增加腸胃的負擔。
2. 少吃糖果
一般新年的糖果等含糖量極高，為預防妊娠期糖尿病，孕媽媽應盡量避免大量進食。孕媽媽亦可選擇以提子乾、無鹽合桃等比較健康的零食代替，當然進食份量亦應適量控制。
3. 少吃蘿蔔糕、芋頭糕等糕點
賀年糕點如蘿蔔糕、芋頭糕等，多加入臘腸、臘肉等含鈉量高的食材，容易引致水腫等不適情況。如有水腫等情況，亦可以飲用少量紅豆水幫助祛水。
只要好好注意以上事項，孕媽媽就可以過一個食得開心的新年
BB出世，莫大喜悅過後，家庭將迎來重大變化，就係要照顧一個沒有自理能力的BB。若果照顧BB的責任，全落在媽媽身上，相信媽媽必定十分辛苦。如父母若能同時照顧BB，除可有助成長外，更有心理學研究指出，BB五個月前若有更多機會接觸爸爸，在面對陌生人時，會表現得更大膽，亦會有較多回應。那作為媽媽，我們可以如何鼓勵爸爸照顧BB呢？
多體諒
作為媽媽，面對BB時，一定母愛洋溢，不忍BB受一點委屈，所以對照顧者一定非常嚴格，尤其照顧者係爸爸時，必定金睛火眼，睇實爸爸有無做錯任何一個細節。可惜，這種母愛卻為爸爸帶來壓力，有些爸爸更因此奉行唔做唔錯，往往唔肯插手照顧BB的事。所以作為媽媽，首先要做既係深呼吸，忍耐一下，要知道爸爸係BB出世果刻佢先升格做爸爸，所有照顧BB的事情佢都要重新學習。我們要俾多些機會爸爸去練習，並溫柔指出正確的做法，咁樣好快媽媽就會有個得力的幫手了。
降低要求
曾聽一個育兒老師講過，只要媽媽降低對爸爸的要求，其實爸爸可以獨自湊BB一日讓媽媽出街抖下，咁個要求係幾低呢？就係只要BB還健康生存就可以。當然呢個老師的意思只係提醒媽媽，我們照顧BB其實不用太過緊張，只要用心其實就可以，所以我們只要能對爸爸降低要求，便會發現他們可以越做越好。
多讚賞
BB出世後，好多時媽媽的注意力都會去晒BB度，面對爸爸會越黎越無耐性。其實係人都鍾意人讚既，當爸爸照顧BB無出錯時，媽媽可以多讚賞，甚至來個抱抱，等爸爸充滿榮耀感及愛，咁爸爸照顧小朋友都會更起勁。
總括來說，照顧BB都係邊做邊學，熟能生巧的事，媽媽只要讓爸爸更有動力，多照顧BB幾次後，他們必能成為專業的奶爸，咁媽媽就係時候可以放手，久不久獨自出去約會朋友抖一抖，媽媽心情愉快，家庭氣氛都會更好。
屋企有新生命誔生，作為父親一定既興奮又緊張。面對剛誔生的小生命以及坐月中的老婆，老公有無咩野可以幫手呢？
1. 多陪伴
首先儘可能抽時間多陪老婆。如果要番工既，放工時間盡可能早些回家，陪老婆一齊食飯，傾下偈，增進夫妻感情，亦可趁機知道BB的不同趣事。
2. 多抱抱
BB剛出世，好多爸爸都會抱不離手，但切記同時亦要多抱抱媽媽，讓她們感覺你的愛。由於荷爾蒙影響，生完的媽媽容易情緒低落，適時的抱抱可有助她們渡過呢段艱難的時期。
3. 多分擔
老婆產後身體多虛弱疲倦，盡可能多幫手照顧BB，例如換片、洗衫、餵食、沖涼等，爸爸只要多看多做，自然容易上手。媽媽既可爭取休息時間，讓身體快快復原，而爸爸亦透過同BB互動增加父子/女感情。
4. 識做醜人
屋企多左個BB，親朋好友一定想盡快過黎見佢一面。不過爸爸要了解剛生完的媽媽身體好易攰，BB剛出世亦不宜多接觸外人，所以儘可能安排親友十二朝過後才到家探訪(尤其爸爸本人的親友，因為媽媽可不方便出聲啊~~)，提醒親友抱BB時洗洗手，而且探訪時間亦不宜過長，讓媽媽同BB都可以有足夠休息。
5. 禁忌說話一句不出口
如果選擇餵人奶，作為爸爸的應該多多支持，要知道餵人奶唔易，媽媽係用最大的決心先決定將最好的俾BB。爸爸要記住，千祈唔好講「BB係咁喊，係咪唔飽？」「你係咪唔夠奶啊？」「不如餵奶粉啦？」呢類說話，亦可友善提醒其他親人不要講。其實BB喊可以有很多原因，只要BB的重量上升、有足夠的排泄片量，喊唔等於BB食唔飽架。
6. 愛的表達
BB出世，不同親友甚至爸爸都會買很多禮物俾BB，好多時會忽略左媽媽。要知道媽媽冒住生命危險送給爸爸這一份無價的禮物，爸爸其實也可買一份小禮物作為回禮，以一件可以睇到的禮物多謝媽媽。
總括一下，其實只要爸爸以愛來待媽媽同BB，多設身處地去想想，自然屋企會充滿歡樂，爸爸亦會有個愉快難忘的坐月時間!!